Matos Moctezuma: "La historia ye implacable nos sos xuicios y nun se pue manipular"

L'arqueólogu empondera los "llazos indisolubles" existentes ente Méxicu y España

L’arqueólogu mexicanu Eduardo Matos Moctezuma, Premiu Princesa d’Asturies de Ciencies Sociales 2022, afirmó esti vienres que la historia ye "implacable nos sos xuicios" y nun se pue "pretender manipulala nin cometer el despropósitu de manipulala".

Na ceremonia d’entrega de los Premios Princesa d’Asturies, que Matos Moctezuma recibió pola so contribución al conocimientu de les sociedaes y cultures prehispániques, aseguró que la historia escríbenla los pueblos, forxadores de "futuros meyores", y que nella la ignorancia ye una "mala conseyera" que munches vegaes lleva a la mentira.

"La historia y l’arqueoloxía llévennos frente a les sociedaes del pasáu y amuesen que munches d’elles fueron creadores d’avances importantes y que, nel so trescursu, surdieron imperios y gobernantes poderosos que na so soberbia creyeron que sedríen eternos, pero nun foi asina", solliñó l’impulsor d’investigaciones que valieron pa reconstruyir les civilizaciones de Méxicu y Mesoamérica.